Inter Milan នឹងប្រើប្រាស់ឯកសណ្ឋានឈុតសម្លៀកបំពាក់ក្រុមទី៣ ពណ៌មាស ក្នុងជំនួបវគ្គផ្តាច់ព្រ័ត្រ ពានរង្វាន់ UEFA Champions League ទល់នឹង Paris Saint Germain នៅលើទឹកដីទីក្រុង Munich ប្រទេសអាល្លឺម៉ង់។
បញ្ហាពណ៌ឯកសណ្ឋានស្រដៀងគ្នា ទៅនឹង Paris Saint Germain ក្លាយជាបញ្ហាមុនការប្រកួត រហូតធ្វើអោយ Inter Milan បង្ខំចិត្តប្រើឯកសណ្ឋានទី៣ ក្នុងវគ្គផ្តាច់ព្រ័ត្រលើកដំបូងក្នុងប្រវត្តិសាស្ត្រ។
Inter Milan ធ្លាប់ឡើងវគ្គផ្តាច់ព្រ័ត្រ UEFA Champions League ចំនួន ៦លើក ដោយពួកគេមិនធ្លាប់ប្រើឯកសណ្ឋានទី៣ នៅការប្រកួតឡើយ ចាប់តាំងពីឆ្នាំ ១៩៦៤ មក។
សម្រាប់ Paris Saint Germain វិញ នឹងប្រើឯកសណ្ឋានក្នុងទឹកដីរបស់ខ្លួន ដែលមានពណ៌ទឹកប៊ិកក្រម៉ៅ លាយឡំជាមួយនឹងឆ្នូតពណ៌ក្រហមលាយពណ៌សរ ហើយគូប្រកួតរបស់ពួកគេមិនអាចប្រើប្រាស់អាវក្នុងទឹកដីមានពណ៌ខៀវទឹកប៊ិក លាយខ្មៅប្រចាំត្រកូលខ្លួនបាន។
មុនការប៉ះគ្នាដណ្តើមពានរង្វាន់ UEFA Champions League នេះដែរ Inter Milan ក៏បានជួបរឿងខកចិត្តដោយបានរបូតពានរង្វាន់លីគកំពូល Serie A ទៅកាន់ដៃគូប្រជែង Napoli ទោះខ្លួនព្យាយាមប្រជែង ទាំងប្រផិតប្រផើយយ៉ាងណាក៏ដោយ។ របូតពានក្នុងស្រុក នឹងអាចធ្វើអោយ Inter Milan ប្តេជ្ញាប្រកួតអស់ពីលទ្ធភាពដើម្បីឈ្នះជើងឯកនៅវគ្គផ្តាច់ព្រ័ត្រលើកនេះ៕
