ចាប់តាំងពីគាត់បានចាកចេញពីក្លឹប Paris Saint-Germain មក Neymar (កាលនោះអាយុ ៣៣ ឆ្នាំ) ទើបតែបានលេងបន្តិចបន្តួចប៉ុណ្ណោះ។ បន្ទាប់ពីរងរបួស ACL រូបគាត់បានលេងឲ្យក្លឹប Al Hilal តែ ៧ ប្រកួតនោះទេ ខណៈដែលការរងរបួសផ្សេងៗទៀតក៏បានធ្វើឲ្យគាត់លេងបានតែ ៤ ប្រកួតប៉ុណ្ណោះ តាំងពីត្រលប់ទៅក្លឹបដើមរបស់គាត់ Santos ក្នុងលីកប្រេស៉ីល។
បច្ចុប្បន្ន គាត់កំពុងស្ថិតក្នុងស្ថានភាពដែលល្អ គឺ កំពុងហ្វឹកហាត់បន្ដិចបន្ដួចដើម្បីសម្រាកសាច់ដុំ និងស្វះស្វែងធ្វើឱ្យសុខភាពប្រសើរឡើងវិញ។ ទោះបីជាយ៉ាងណា នៅក្នុងសំណួរដែលបានសម្ភាសន៍ជាមួយ L’Équipe ឪពុករបស់គាត់ លោក Neymar Sr. បានឲ្យដឹងថា កូនប្រុសរបស់ខ្លួន នៅតែមានតម្លៃនៅលើទីផ្សារ ហើយមានក្លឹបជាច្រើនកំពុងចាប់អារម្មណ៍។
“មនុស្សមួយចំនួន អាចគិតថាគាត់ចប់ហើយ តែខ្ញុំឃើញថាទីផ្សារគាត់នៅតែមានចំណាប់អារម្មណ៍” គាត់និយាយ ។
មានក្លឹបនៅអឺរ៉ុបដែលនឹងលេងក្នុង UEFA Champions League នៅរដូវកាលក្រោយ ក៏មានចំណាប់អារម្មណ៍ចង់បាន Neymar ដែរ។ ឯកសាររបស់ L’Équipe បានចុះផ្សាយថា Fenerbahçe ជាក្លឹបមួយដែលចង់បាន Neymar។
លោក Neymar Sr. ក៏បន្ថែមថា សប្តាហ៍នេះ លោកនឹងទៅទីក្រុង Miami ដើម្បីពិភាក្សាជាមួយក្លឹបផ្សេងៗ ហើយក៏មិនបដិសេធលើការដែលថា Neymar អាចនៅតែស្នាក់នៅ Santos បន្ដដែរ។
“មានភាគរយខ្ពស់ដែលគាត់អាចនឹងនៅ Santos បន្ដ ព្រោះខ្ញុំកំពុងធ្វើការលើរឿងនេះ តែវាមិនបានរារាំងឲ្យយើងស្តាប់សំណើរពីក្លឹបផ្សេងទៀតនោះទេ” គាត់បន្ថែម ៕
